ဇူလိုင် ၂၇ – ၂ဝ၂၅
KKO(VOM)
PPP ပါတီက လာမယ့်ရွေးကောက် ပွဲမှာ တပြည်လုံးအတိုင်းအတာအနေနဲ့ မဲဆန္ဒနယ်အားလုံးမှာ ဝင်ရောက်ယှဉ်ပြိုင်သွားမယ်လို့ ပြည်သူ့ရှေ့ဆောင်ပါတီ(PPP)ဥက္ကဌ ဒေါ်သက်သက်ခိုင်က ဒီကနေ့ ဇူလိုင်၂၇ ရက်နေ့ ရန်ကုန်မြို့ဆီဒိုနားဟိုတယ်မှာပြုလုပ်တဲ့ သတင်းရှင်းလင်းပွဲမှာ ပြောကြားလိုက်ပါတယ်။
“၂ဝ၂၃ ခုနှစ်မှာပြဌာန်းလိုက်တဲ့ နိုင်ငံရေးပါတီများမှတ်ပုံတင်ခြင်းဥပဒေအရ ပြည်ထောင်စုတဝှမ်းလုံးမှာယှဉ်ပြိုင်ဖို့ မှတ်ပုံတင်ထားတဲ့ပါတီအနေနဲ့ ဆိုလို့ရှိရင် UEC ကသတ်မှတ်ထားတဲ့ သတ်မှတ်ချက်တွေရှိပါတယ် ။ဒါတွေလည်းကျွန်မတို့ပြည့်မီပြီးဖြစ်ပါတယ်။ ပြည်ထောင်စုတဝှမ်းလုံးမှာယှဉ်ပြိုင်မယ့်ပါတီအနေနဲ့ဆိုရင် မဲဆန္ဒနယ်ရဲ့တဝက်မှာယှဉ်ပြိုင်နိုင်ရမယ်။ ဒါကိုလည်းကျွန်မတို့ပါတီအနေနဲ့ မဲဆန္ဒနယ်တဝက်မကယှဉ်ပြိုင်သွားဖို့ရှိပါတယ်”လို့ PPP ပါတီ ဥက္ကဌ ဒေါ်သက်သက်ခိုင်က သတင်းမီဒီယာတွေကို ပြောပါတယ်။
လက်ရှိမှာ ပြည်သူ့ရှေ့ဆောင်ပါတီ(PPP)အနေနဲ့ ရွေးကောက်ပွဲကော်မရှင် UEC က ပါတီဝင်အဖြစ်သတ်မှတ်ထားတဲ့လူဦးရေ အရေ အတွက် ၉၃၅၀၈ ဦးရှိပြီးဖြစ်သော်လည် နောက်ပိုင်းမှာထပ်ဝင်လာတဲ့ ပါတီဝင်အရေအတွက်နဲ့ဆိုပါက ၁၃ဝ,ဝဝဝ လောက်ရှိနေတယ်လို့ဆိုထားပြီး ပါတီရုံးခန်း ၁၁ဝ ရှိရမယ့်နေရာမှာလည်း ဒါကိုကျော်လွန်ပြီး ပါတီရုံးခန်းပေါင်း ၁၃၇ ရုံးအထိဖွင့်လှစ်ထားနိုင်ပြီဖြစ်တယ်လို့ PPP ပါတီတာဝန် ရှိသူတွေက ဒီကနေ့ သတင်းစာရှင်းလင်းပွဲမှာပြောပါတယ်။
ဒီလိုပြည်ထောင်စုတဝှမ်းလုံးက မဲဆန္ဒနယ်တွေမှာယှဉ်ပြိုင်ဖို့ဆုံးဖြတ်ခဲ့တာဟာ မဲပေးကြမယ့် မဲဆန္ဒရှင်ပြည်သူတွေကိုလေးစားလို့ဖြစ်တယ်လို့လည်းပါတီ ဥက္ကဌ ဒေါ်သက်သက်ခိုင်က အခုလိုဆက်ပြီး ပြောပြပါတယ်။
“ကျွန်မတို့က မဲဆန္ဒနယ်တဝက်မကယှဉ်ပြိုင်မယ်၊အခု UEC ကလည်းကြေညာထားတယ်။၂၆၇ မြို့နယ်မှာကျင်းပပေးမယ်။ ကျွန်မတို့ကြိုးစားပြီးတော့မှ တနိုင်ငံလုံးအတိုင်းအတာအနေနဲ့ ပါဝင်ယှဉ်ပြိုင်နိုင်အောင်ကြိုးစားနေတယ်။မဲဆန္ဒနယ်တဝက်ကျော်ရင်ပြည် ထောင်စုအဆင့်ပြည့်မီပြီ၊သို့သော်မဲဆန္ဒနယ်အကုန်လုံးမှာပါဝင်ချင်တာက ကျွန်မတို့ပါတီကိုမဲပေးချင်တဲ့မဲဆန္ဒရှင်တွေကို လေးစားတဲ့အနေနဲ့ ကြိုးစားပြီးတော့ မဲဆန္ဒနယ်အသီးသီးမှာ ယှဉ်ပြိုင်သွားမှာဖြစ်ပါတယ်”လို့ ပါတီ ဥက္ကဌ ဒေါ်သက်သက်ခိုင်က ပြောပါတယ်။
ဒါအပြင်စစ်ကိုင်းတိုင်းအတွင်းက မြို့နယ်အချို့မှာလည်း PPP ပါတီရဲ့ရုံးခန်းတွေကိုလုံခြုံရေးအခက် အခဲတွေကြားကနေ ဖွင့်လှစ်နိုင်ခဲ့တယ်လို့ ပါတီတာဝန်ရှိသူတွေကပြောပါတယ်။
အဲဒါအပြင် တပြည်လုံးက မဲဆန္ဒနယ်တွေမှာယှဉ်ပြိုင်နိုင်ဖို့အတွက် ကိုယ်စားလှယ်လောင်းတွေကို စုစည်းထားရှိတယ်လို့ ပါတီတာဝန်ရှိသူတွေက ဆိုထားပြီး အခုလာမယ့်ရွေးကောက်ပွဲမှာကျင့်သုံးမယ့်အချိုးကျမဲပေးစနစ် PR ကိုကျင့်သုံးမယ်ဆိုတာကလည်း ဒါကရိုးရှင်းတဲ့စနစ်ဖြစ်တယ်လို့ ပါတီတာဝန်ရှိသူတွေက ပြောပါတယ်။
သို့သော်လည်း လာမယ့်ရွေးကောက်ပွဲမှာ ကိုယ်စားလှယ်လောင်းတွေရဲ့လုံခြုံရေးစိန်ခေါ်မှုကတော့ ကြီးမားနေဆဲဖြစ်တယ်လို့
PPP ပါတီ တာဝန်ရှိသူတွေက ဆိုပါတယ်။
“လာမယ့်ရွေးကောက်ပွဲမှာ ရွေးကောက်ပွဲကိုလက်ခံတဲ့ သာမန်ပြည်သူတွေလည်းရှိနိုင်သလို ရွေးကောက်ပွဲကိုဆန့်ကျင်မယ့်၊လုံခြုံ ရေးကိုပျက်ပြားအောင်လုပ်မယ့်သူတွေလည်းရှိပါတယ်။ဒါကလည်းဘယ်ပါတီကပဲဖြစ်ဖြစ်၊ နိုင်ငံရေးပါတီအားလုံးကကိုယ် စားလှယ်လောင်းတွေကိုပြည်သူကြားမဆင်းနိုင်အောင်အနှောင့်အယှက်လုပ်ချင်တဲ့သူတွေလည်းရှိတယ်။တော်တော်လေးတော့မြန်မာ နိုင်ငံမှာလုံခြုံရေးက စိန်ခေါ်မှုဖြစ်ပါတယ်”လို့ ပါတီဥက္ကဌ ဒေါ်သက်သက်ခိုင်က ထပ်လောင်း ပြောပြခဲ့ပါတယ်။
ဒီကနေ့ ဆီဒိုနားဟိုတယ်မှာပြုလုပ်ခဲ့တဲ့ သတင်းစာရှင်းလင်းပွဲမှာ ပြည်သူ့ရှေ့ဆောင်ပါတီ(PPP)ရဲ့မူဝါဒနဲ့ ရည်မှန်းချက်တွေ ပါတီကိုယ်စား လှယ်လောင်းတွေရဲ့စုစည်းထားရှိမှုအခြေအနေ၊မဲဆန္ဒနယ်တွေမှာဝင်ရောက်ယှဉ်ပြိုင်ဖို့ ကြိုတင်ပြင်ဆင်ဆောင်ရွက်နေပုံတွေနဲ့ တရုတ်နိုင်ငံ အပါအဝင် အခြားသောပြည်ပနိုင်ငံတွေနဲ့ PPP ပါတီအကြား ဆက်ဆံရေးအခြေအနေ အကြောင်းအရာတွေကို ပါတီတာဝန်ရှိသူတွေက ကဏ္ဍအလိုက် သတင်းမီဒီယာတွေကို ရှင်းလင်းပြောကြားခဲ့တာပဲဖြစ်ပါတယ်။
ဒါအပြင် PPP ပါတီရဲ့ မူဝါဒနဲ့ ရည်မှန်းချက်တွေထဲမှာ အလုပ် သမားအခွင့်အရေးကိစ္စ၊ပြည်ပရွှေ့ပြောင်းလုပ်သားရေးရာကိစ္စရပ်တွေ အပါအဝင် ကုန်သွယ်ရေးကဏ္ဍနဲ့ အမျိုးသမီးအခွင့်အရေးဆိုင်ရာကဏ္ဍနဲ့ ကုန်ဈေးနှုန်းကိစ္စရပ်တွေ ပါဝင်နေတာကိုလည်း တွေ့ရပါတယ်။
ဒီကနေ့ သတင်းစာရှင်းလင်းပွဲကို PPP ပါတီ ဗဟိုအလုပ်အမှုဆောင်ပအဖွဲ့ဝင်တွေနဲ့ ပါတီဝင်များ၊သတင်းမီဒီယာတွေ အပါအဝင် ဖိတ်ကြားထားသူတွေလည်းတက်ရောက်ခဲ့ကြတာကိုတွေ့ရပါတယ်။
Photo – VOM
ပုံစာ – ဒီကနေ့ ပြုလုပ်တဲ့ PPP ပါတီသတင်းစာရှင်းလင်းပွဲ။
